ဝတ္ထု မိက်ဂွံဒုၚ်သၠေံ

မိက်ဂွံဒုင်သၠေံ

~~~~~~~~~

= အဆာန် ကဵု ဣဒါ

    ညးၜါဒှ်ဂွံကဝေင်ညးသ္ကံ ဟွံလအ်ကွေံဏီ

    အာယုက်ကဝေင်ဂွံစၜိုတ် - ၈ - ဂိတုပြင်ညိရ။

= ယၟုညးၜါပေင်ပေင်ဂှ်

   " မာံဆာန်သိုက် , မိစန္ဒာ " ရ။

= အခိုက်မန်ပိုဲနွံဒၟံင်မွဲဂှ်

   ပလီုယၟုဆဒှ်ကဵုဒှ်တုဲကော်တံ

   နုက် / ထပ် ယၟုတုဲကော်တံ ဗီုဏံနွံဒၟံင်ရ။

= ဟိုတ်ဂှ်ရ

   ဆာန်သိုက်ဂှ် ကော်စဒၟံင် ' အဆာန် '

   စန္ဒာဂှ် ကော်စဒၟံင် ' ဣဒါ ' ကော်ဗီုဏံမှ

   ရဲကွာန်တံတီတဴအိုတ်ရ။

= စိုပ်ကၠုင်ဂိတုစဲမ္ဂး

    ပ္ဍဲကွာန်အနေင်ဏံ ဇၟာပ်သၞာံ သ္ဘင်ကျာ်ဒဵုနွံဒၟံင်တုဲ

    ညးအုပ်ဓုပ်ကျာ်တံ လိင်လဝ်ပေဲါ ' ဆာန်ညဳဆာန် ' ရ။

= ဗ္တံဏံ... အဆာန်ပလံင်ဏာဣဒါ

   ကဵုရဲဣဒါၜါ ကြေဝ်ဗဵုပေဲါရ.....

    အဆာန်ဂှ်

    စသုင်ဝေင်ဂြိုင်ဟွံလေပ်

    ကဵုမၞိဟ်ဗြဴတၞဟ်တံလေဝ် မံင်သောင်ဒၟံင်ရ.....

    ဆဂး... ပရေင် ' မိတ် ' တှ်ေ

    မၞိဟ်တြုံ / မၞိဟ်ဗြဴ ဟွံရုဲ ကဵုဒၟံင်အရီုဗင်

    ဟီုဂးဆက်ဆောံစ ကၠောံကၠောံက္ဍက္ဍလေပ်ရ.....

    ဣဏံဂဟ်

    ဣဒါ... တီကၠိုဟ်ဒၟံင်လ္တူကဝေင်ဇကုဖအိုတ်ရ။

= အဆာန်... ပလံင်ဏာကဝေင်ဇကုကဵုရဲဍေံၜါ

    ရာန်သုင်ဍာ်ဂံက်ဂံက် ပ္ဍဲဖျာဂကောံဘာဥတုက္ညင်တုဲ

    သီုရာန်ဏာကဵုကွာင် သွက်ဂွံစအခိင်ဗဵုပေဲါတေံရ။

= အဆာန်... ပလံင်ဏာဣဒါ ကဵုရဲဣဒါတံ

   လုပ်အာဒၞာဲသကဝ်မရာန်လဝ်တေံရ။

= ရဲဣဒါၜါ

    ကၠိုဟ်ဒၟံင်သဘဴရဲနွံကဵုကဝေင်တံတုဲ

    ဂဇအ်ထောံဂတ အဆာန် ကဵု ဣဒါ တံရ။

= ဂွံမွဲလ္စုတ်

   အဆာန်ဟီုကဵုဣဒါ ကဵုရဲဣဒါတံ

   ဗှ်ေတအ် ဂဇအ်ဗဵုဒၟံင်အဏံအိုတ်ဏး

   အခန်ဝေင်ဇာတ်တေံတိတ်မှ အဲလုပ်ဂဇအ်

   အဲကြေဝ်ဝေင်ကျာကဵုသ္ကံရဲတံ မွဲလ္စုတ်ဏောင်.....

   ဂွံလေဝ်... အာ ဣဒါဟီုဏာတုယ်

   အဆာန်တိတ်ကၠုင်နူဣဒါတံရ။

= ဍာံဍာံဂှ်...

   ဣဒါ ညိဟွံမိက်ကဵုအဆာန်တိတ်ပုဟ်

    ဂွံဂဇအ်ကဵုကဝေင်ဇကုမွဲစွံလအ်လအ်ဂှ်ဏောင်

    ဣဒါ မိက်ဂွံကဵုဒှ် ဣဏံဓမ္မတာသဘဴကဝေင်ရလေဝ်.....

    ဆဂး... ဖေက်ကဝေင်ဇကု

    စိုတ်လီုတုဲ ကဵုဏာအခေါင် နကဵုစိုတ်ခုတ်ခုတ်ရ။

= အခန်လှ်ေဒယှ်ေတုဲဒှ်အိုတ်

   ၜိုတ် - ၁၂ - နာဍဳပြင်ညိ အခန်ထ္ၜးဇာတ်တေံတိတ်

   အဆာန်... လုပ်ကၠုင်ဂဇအ်စှ်ေဗဒဲါကဝေင်ဇကုရ။

= အဏံ... ဣဒါခုတ်ဒၟံင်ဖိုဟ်

   ဟိုတ်နူအဆာန်တိတ်အာမ္ၚးတေံလအ်.....

   ဓမ္မတာရလေဝ်

   ဇၟာပ်မၞိဟ်ဗြဴရ အခိုက်ဏံဒှ်စလေပ်ဖအိုတ်ရ။

= မၞိဟ်ဗြဴလ္ၚဵု

   ဟိုတ်နူအထေင်ဗၠေတ်တုဲ ခုတ်ဟီုညေအ်နွံဂှ်.....

    မၞိဟ်ဗြဴလ္ၚဵု

    မိက်ဂွံဒုင်သၠေံတုဲ ခုတ်ဟီုညေအ်လေဝ်နွံစလေပ်ရ။

= ဣဒါ... ဒဵုကဵုစိုပ်က္ဆံင်အထေင်ဗၠေတ်ကွေံကွေံတုဲ

   ခုတ်တ္ၚံက်ဟီုဒၟံင်ကဵုအဆာန်ဟွံသေင် ဟီုဂွံကီုလေဝ်.....

    ဆဂး... ဓရ်ပတှ်ေဣဒါ လ္တူအဆာန်ဂှ် ဟွံသ္အးစကွေံကွေံ

    ဟိုတ်နူအဆာန်ဆက်ဆောံဒၟံင်ကဵုရဲမၞိဟ်ဗြဴတံခိုဟ်ဒၟံင်တံဂှ်ရ.....

    

   အကြာကြာဓဝိင်ဇကုဂှ်ရ

   ဟိုတ်နူမိက်ဂွံဒုင်သၠေံကဵုကဝေင်ဇကုတုဲ

   ခုတ်တ္ၚံက် , ညေအ်ဒၟံင်ကဵုကဝေင်ဇကုလေဝ်ပါဒၟံင်ကီု။

= ပွဒ္ဂေတ်ဗီုဗီုစဏံဂှ်

   ဒှ်ကၠုင်နူစိုတ်က္ဍုဟ်တံဟွံသေင်

   ဒှ်ကၠုင်နူစိုတ်ဆာန်တံရဏောင်ဂှ် သ္ပသတိမှတီရ။

   စိုတ်ခုတ်တ္ၚံက်စဏံဂှ်

   ပ္ဍဲအပ္ဍဲပရေင်ဆာန်တံ ဍေံဒှ်ကၠုင်ဂှ်.....

   လဆောဝ်... ဍေံတူရူအာကဵုလ္ပာ်ခိုဟ်တံနွံဂှ်

   လဆောဝ်... ဍေံတူရူအာကဵုလ္ပာ်ပရေံလေဝ်နွံရ။

= ဣဒါလေဝ်

   ဟိုတ်နူခုတ်တ္ၚံက်ဒၟံင်စိုတ်တုဲ ဟီုဏာကဵုအဆာန်

   လၟုဟ်ဂွံစိုပ် တက်ဒၟံင်ကျာကဵုဗြဴလဵု.....

   အဆာန်လေဝ်ချပ်ဂွံဒၟံင်

   နူစနွံဒၟံင်မ္ၚးတေံရ လ္ပာ်ဣဒါထေဲ.....

   ဟိုတ်နူဒးရံင်လ္ပာ်ရဲလေဝ်ကီုတုဲ

   ဟွံဒှ်လေပ်ကၠုင်ပြဟ်ပြဟ်ဏီ ၜိုန်ဂှ်

   လုပ်ကၠုင်ကဵုကဝေင်ဇကု ဟွံလ္ဇုဲအာပုဟ်လေဝ်။

= အဆာန်ဂှ်... ဟွံကေင်စွံလဝ်ကဝေင်မွဲလှ်ေ

    ဣဒါဂှ်... ကေင်စွံလဝ်ကဝေင်ၜါပိကီုရ.....

    အဆာန်... ၜိုန်ဟွံကေင်စွံလဝ်ကဝေင်ကီုလေဝ်

    ဟိုတ်နူကေင်ဆဵု , ကေင်မိင်လဝ် နွံညိညကီုတုဲ

    နကဵုဗဟုသုတ တီဒၟံင်ပရေင်ကဝေင်တံညိညကီု ဟွံဂၠိုင်။

= လ္ပဟီုဗီုဂဟ်ဗေဟ်

    ကဝေင်အဲနွံဒၟံင်ဗှ်ေမွဲရ.....

   ဗှ်ေလေဝ်တီဒၟံင်ရ ပရေင်အဲ

   ကဵုဗြဴတၞဟ်... အဲမိပ်ဟွံလေပ်ပုဟ်

   ကဵုဗြဴတၞဟ်... စိုတ်အဲလေဝ်ဟွံလေပ်စပုဟ်ဂှ်။

= မုပ... ကျာကဵုရဲ ဒးလအ်ဒၟံင်လလအ်ဏံ

   ထောံလဝ်ညးတၞဟ်မွဲဓဝ်တုဲ ကျာဒၟံင်ကဵုဗြဴလဵုဟွံတီ.....

   လ္ပဟီုဗီုဂှ်ဗှ်ေ အဲဂွဒၟံင်ဏောင်

   အဲလဴကဵုဒၟံင်တပ်တပ်ဖိုဟ် ဗှ်ေထေင်ဒၟံင်ဗီုဂှ်ဖိုဟ်

   အဲဒုင်စသိုင်ဝါတ်ဒၟံင်ဗှ်ေ ဗှ်ေဒေံါဂွံရ။

= သဘဴမၞိဟ်ဗြဴဟီုဂှ်

    ပ္ဍဲပရေင်ဆာန်တံတှ်ေ အတိုင်မာယာဍေံတံ

    ဍေံတံဟီုစအရေဝ်ပၠန်ဂတးလေပ်ရ.....

    ဥပမာ... အာ ညိလ္ပတက်ကျာကိုဝ်အဲ

    ဍေံဟီုတေဟ် ဍေံမိက်ဂွံကဵုတက်ကျာကဵုဍေံရ.....

    ဍေံဟွံဆာန်ရပုဟ် ဍေံဟီုတှ်ေ

    ဍေံဆာန်ဒၟံင်ရ ဍေံမိက်ဂွံကဵုဇကုတီ.....

    မပတံ... ဗီုဗီုဏံ အရာအရာအိုဿီုရ

    ဍေံတံဟီုစအရေဝ်ပၠန်ပၠန်ဂတးဂတးလေပ်ဒၟံင်ဏောင်.....

    အခိင်ဍေံတံဆာန်ဒၟံင်ဂှ် ဍေံတံညေအ်ရ

    အခိင်ဍေံတံညေအ်ဒၟံင်ဂှ် ဍေံတံမိက်ဂွံကဵုသၠေံရ

    အခိင်ဍေံတံမိက်ဂွံကဵုသၠေံဂှ် အရေဝ်ညံင်ဂွံသၠေံဍေံတံ

    ဍေံတံဟီုရ.....

   ဟိုတ်ဂှ်ရ

   လ္တူအရေဝ်ဍေံတံ ဟီုဏာမွဲမွဲဂှ်

   မၞိဟ်တြုံတံ ဆန္ဒလ္ပပြဟ်ညိ မိက်ဂွံဟီုဟဂှ်။

= လၟုဟ်... ဣဒါလေဝ် ဗီုဂှ်ကီု

   ဟိုတ်နူကဝေင်ဇကု တိတ်မ္ၚးလအ်အာတုဲ.....

   အကြာအကြာဓဝိင်ဆာန်ဂှ်

   ခုတ်ဒၟံင် , တ္ၚံက်ဒၟံင် , ညေအ်ဒၟံင် , ဟီုဒၟံင် တံဂှ်

   မိက်ဂွံဒုင်သၠေံကဵုကဝေင်ဆာန်ဆာန်ဇကုဏောင်။

= အဆာန်ပၠန်

    ၜိုတ်သောင်ကလးလေဝ် သောင်ကလးဒၟံင်ကီုရ

    ၜိုတ်ဒုင်ဂုဏ်လေဝ် ဒုင်ဂုဏ်ဒၟံင်ကီုရ.....

    ဆဂး... ဣဒါထေဲဒၟံင်ဟွံပြေလောဲလောဲတုဲ

    တက်ဒၟံင်ကျာကဵုရဲတွဵုလေဝ် တက်ဒၟံင်ကျာကဵုဗြဴလဵုဟွံတီ။

= လ္ပဟီုဗီုဂဟ်ဗေဟ်

    အဲဟွံဗက်မိပ်ကဵုဗြဴတၞဟ်မွဲလှ်ေပုဟ်ဂှ်

    ဗှ်ေလေဝ်တီဒၟံင်ရ လ္ပဟီုရ ကေတ်ရ ကေတ်ရ.....

    အဲပပတေဟ်ဟွံစေဟ်

    အာ... မုပ ဟွံလုပ်ဂဇအ်ကရောံဗြဴဂှ်.....

    အဆာန်... မိက်ဒးအရေဝ်ဏံမွဲပါင်

    ဒေါသတေံ ယာတိုန်နော် ထိင် ,အေင် ဟွံမာန်လောန်တုဲ.....

     မုပ... အဲဟီုဒၟံင်အရေဝ်ဍာံဍာံဂလိုင်ဏံရဂှ်

     ဗေဟ်ဒးဒှ်ဒၟံင်ဂလိုင်ဏံဟာဣဒါ ဟီုဟီုဂးဂး.....

     အဆာန်... က္တဵုတေံဏာကဵု

     စးဣဒါ " အပုန် " လ္ဒောဝ်ပေဲါဂှ် ဟဂှ်ရ။

= သ္ကံရဲၜါ မိင်ဗရုရမျာင်ဣဒါတိတ် " ယာဲမိ " မှ

    ဂတးရံင်လ္ပာ်ရဲဇကုမွဲတဲ ဣဒါဂစိုင်လဝ်က္ဍိုပ်

    လရိုအ်ခအိက်ဒၟံင်ဖိုဟ်.....

    ရံင်အာလ္ပာ်အဆာန်မွဲပၠန်

    အဆာန်... တိတ်အာ ကြပ်စိုပ်မ္ၚးတေံဣရ။

= မုဒှ်ညးသ္ကံရောဣဒါ ရဲၜါသၟာန်နင်ဂှ်

    ဣဒါလဴဟွံတိတ် ဂွကဵုရဲဗဵုပေဲါဂမၠိုင်တုဲ

    ဂစိုင်လရိုအ်ဒၟံင်သ္ၚိတ်သ္ၚိတ်အဂှ်ရ.....

    ဒှ်ရဣဒါ

    ဗှ်ေတံညးၜါ ပိုဲလေဝ်ဟွံကေင်ဆဵုဒှ်သၞမွဲလှ်ေ

    ကာလဒှ်ရဂှ် ဒှ်စုတ်အကြာမၞိဟ် , အကြာလ္ဒောဝ်ပေဲါၝာဲ။

= ညးၜါဏံ

   ဟိုတ်နူပၟိက်ဟွံတုပ် , လ္ညာတ်ဟွံတုပ်

   လဆောဝ်... ဒှ်ဒၟံင်ညးသ္ကံညိညိကီုလေဝ် ဟွံဒက်စိုတ်

   ဆဂး... ဟွံကဵုညးတၞဟ်တီပရေင်ပရူပရာဇကု။

= အဆာန်ဂှ်

   မၞိဟ်စိုတ်ခိုဟ်ခိုဟ်မွဲဏောင် ဣဒါတီဒၟံင်ရ

   လဆောဝ်... အဆာန်စိုတ်ပိုတ်စလေပ်ဏောင် ဣဒါတီဒၟံင်ရ.....

    ဆဂး..... အလန်ဏံ ဟိုတ်နူဣဒါညေအ်ဂၠိုင်အာကီု

    အရေဝ်ဣဒါ ဟိုတ်နူဇီုကပိုက်ဒး " သိက္ခာ " အဆာန်ကီုတုဲ.....

     ညးၜါ..... သီုဟွံက္ဍုဟ်ညးသ္ကံမွဲသာ်

     ဟိုတ်နူဓရ်ဆာန်လောန်ကာဲ စိုတ်တေံဂၠုဓီုအာတုဲ

     ဣဒါဟီုဒးအရေဝ်ဇၞော်အာဂှ်ရ.....

     ပရေင်ညးၜါ

     ဒးဒဟ်အာညးသကံဗီုဗီုဏံ သိုမ်မဂိုဟ်ကဟောံရ။

= ဍာံဍာံတေံ... ဣဒါဒးကၠိုဟ်တီလဝ်

    သဘဴကဝေင် , သဘဴဆာန် တံ ဂၠိုင်နူအဆာန်ဏီရ.....

    မုဟိုတ်ရောမ္ဂး

    ဣဒါဂှ် ပိုတ်လဝ်ကဵုကဝေင်ၜါပိတုဲဣရ

    အဆာန်ဂှ် ပဲါနူဣဒါ ဟွံစွံလဝ်ကဝေင်မွဲလှ်ေ.....

    ဟိုတ်ဂှ်ရ

    ပရေင်ဆဵုဂဗဣဒါ

    ဒးကြံင်က္ဍုဟ်နူအဆာန်ဏီ ဒးဒှ်ရ။

= သၞာံတေံလအ်အာတုယ်

    ရဲအဆာန်တံမွဲသ္ကံလေဝ် ဒှ်အာအိန်ထံင်အိုတ်

    လ္ၚဵုကောန်မွဲ , လ္ၚဵုကောန်ၜါ , လ္ၚဵုမွဲဟွံဂွံ ဗီုညးကဵုညးရ.....

    ရံင်အာလ္ပာ်အဆာန်

    အဆာန်မွဲ ဒှ်ဒၟံင်ဗၠာဲဇမၞော် ( ဗၠာဲဟဇၞော် ) ဖိုဟ်။

= တ္ၚဲဏအ်.....

    သ္ကံရဲမွဲတၠ စဝ်ကပေါဝ်ကောန်ဗၠာဲ

    ဍေံဘိက်လဝ်ဂကောံသ္ကံရဲတံတုဲအဆာန်လေဝ်ကၠုင်ကီု

    စိုပ်အဏံ ရဲဂှ် ဖျေအ်ဗပေင်လဝ် စၞၜဳ အခိုက်သေံတံ

    သီုကဵုဍာ်တၞးခိုဟ်ဗွဲမဍိုက်ပေင် ဒုင်တၠုင်ရဲတံရ.....

    အဆာန်ဂှ်

    ဍာ်တၞးကီု ဂဥုဲချေံကီု တုဲဒၟံင်ဖအိုတ် မၞိဟ်ဗီုဂှ်ဟွံသေင်

    ဗီုဗီုဏံ နူဍောတ်ဍောတ်တေံ အဆာန်ဟွံသုင်ဒၟံင်ရရ.....

    လှုဲဟွံမွဲတှ်ေကေတ်

    ဒၞဲာသၟးသၟးတေဟ် သၟးသၟး , ဒၞဲာဂၠေအ်တေဟ် ဂၠေအ်

    ပရေင်မိတ် , ဝတ်မိတ် တံဂှ် အဆာန်ဟွံကဵုလီု.....

    ဆဂး... လ္ပကော်ဖျုင် ဆလအ်အဆာန်ဟွံသုင်ရ

    အဆာန်ဂှ် ဓဝိင်လ္တူမိမဇၞော် ဖေက်မိမဒှ်ဒဒိုက်စိုတ်.....

    ဟိုတ်ဂှ်ရ

    အဆာန်ဂှ်... ဒှ်ကောန်ခိုဟ်မွဲ

    ဒှ်မၞိဟ် ဂွံအထိုင်အသး အကြာမၞိဟ် အကြာသ္ကံရဲတံရ။

= အဆာန်... ဣဒါမွဲ ဂွံအာကောန်ၜါရဂှ်

    ၝဟွံဖျေံဒၞာဲဏီဟာ , ၝမံင်အာအတိုင်ဏံရဟာ.....

    အဆာန်... အီဒၟံင်သောဲသောဲကဵုရဲတံတုဲ

    ဟီုဏာၜိုဟ်ၜိုဟ်သြိုဟ်သြိုဟ်တန်တန်ကြန်ကြန်

    အရေဝ်မွဲပါင်ဂှ်.....

     " အဲဟွံဖျေံဒၞာဲရပုဟ်

        မိမအဲဟွံမွဲတုဲ အဲတိတ်ပၞာန်ပၠန်ဂတး

        သွက်ဂကူအဲ ဂွံဗၠးၜးနူသၟဝ်တဲဗမာဏောင် "

= ဒှ်ညိဟာ အဆာန် အရေဝ်ၝဂှ်.....

    ဒှ်တွဵုလေဝ်ရဲတံ

    စၞးဒုင်သ္ပဒၟံင်ဍိက်ကဵုသေဌဳတံ

    စၞးဒုင်သ္ပဒၟံင်ဍိက်ကဵုဂကူညးတၞဟ်တံဂှ်

    အဲဒုင်သ္ပဍိက်ကဵုဂကူအဲရဏောင်.....

     မိမအဲဟွံမွဲအိုတ်တုဲ

     ချိုတ်ချိုတ်ဂျိုင်ဂျိုင် အဲလုပ်ပၞာန်တွဵုရ

     မၞိဟ်တြုံဟီုဂှ် သုသာန်ဟွံမွဲ အလဵုချိုတ်ချိုတ်.....

    အခိင်ဂှ်တှ်ေ

    ဗြဴဝါသနာတုပ် , စိုတ်ဓါတ်တုပ် , တင်ရန်တၟံတုပ်

    ဆာန်အဲတုဲ ပံင်ကဵုအဲမာန် ဆဵုဂဗကၠုင်ဗီုဏံတှ်ေ

    ကာလဒးကေတ်လေဝ် ကေတ်ပၠန်ရဗြဴ။

= ရဲဆာန်တံမွဲသ္ကံ

    မိင်ဒးအရေဝ်တင်ရန်တၟံအဆာန်တုဲ

    သ္ၚိတ်အာမွဲလ္စုတ် အမ်သဝ်အာပ္ဍဲစိုတ်တေံတၟာဂလိုင်.....

     အဆာန်... နူစပိုတ်အာကဵုဣဒါတုဲ

     ဇကုတေံဒးအာကဝေင်ဇကုအကြာမၞိဟ်ဂှ်.....

     အခိင်တၟိတၟိတေံတှ်ေ

    ဆာန်ဍူဒၟံင် , ကဟောံဒၟံင်စိုတ်တၟာဂလိုင်

    ဆဂး... ထိင်စိုတ်ဟွံမာန်တုဲဒှ်အာ အရေဝ်ဏံ

     အဆာန်ကေင်ပံက်ဒၟံင်ဩိုဟ်ကီုရဲတံညိညိကီုရ.....

    

     ဟိုတ်ဂှ်ရ

     စာတ်ဒၟံင်ကဵုဝုတ်တၞဟ်လေဝ် အဆာန်ဟွံကေတ်

     ပရေင်ကဝေင်လေဝ် ဟွံမိင်အဆာန်ဟီုမွဲလှ်ေ

     လၟုဟ်မှ ဂွံတီအာတင်ရန်တင်တၟံအဆာန်ဂှ်ရ

     ရဲတံအမ်သဝ်အာ။

======== ခန်လ္ၚတ် ========

= ပ္ဍဲလောကဏံ

   အရာလဵုမွဲဟွံဟီု ပယျဵုဒၞက်ဟီုဂှ် နွံဒၟံင်ဖအိုတ်ရ။

= ဆာန်လေဝ် ပယျဵုဒၞက်နွံ။

    အေင်ဒုင်လေဝ် ပယျဵုဒၞက်နွံ။

    သၠးအခေါင်လေဝ် ပယျဵုဒၞက်နွံ။

    ဒုင်ဂုဏ်လေဝ် ပယျဵုဒၞက်နွံ။

    ကၠိုဟ်ကဵုစိုတ်လေဝ် ပယျဵုဒၞက်နွံ။

    အရာအရာဂှ်

    ဟိုတ်နူပယျဵုဒၞက်ဍေံနွံတဴဒၟံင်ဖအိုတ်ဂှ်ရ

    သတိဂှ် စွံလဝ်ညိ , အတ္တဂှ် ဖအောန်လဝ်ညိ။

= ပယျဵုဒၞက်ဟီုဂှ်

    တုပ်တဴညံင်ရဴတၞုင်ဇုက်တောဝ် ပ္ဍဲသ္ၚိဝဴတံကီုရ။

= ဇုက်တောဝ်တံဂှ်

    တုပ်တဴညံင်ရဴဓရ်ကၠိုဟ်ခၠင်တံကီုရ။

= ဇုက်တောဝ်

    ပူလဝ်ပ္ဍဲသ္ၚိဝဴဂှ် ဂၠိင်တှ်ေ

    ဂွံဗလးပတိုန်လဝ်ဝဴဂှ် ဂၠိင်ရ.....

    ဇုက်တောဝ်

    ပူလဝ်ပ္ဍဲသ္ၚိဝဴဂဟ် ဂၠေအ်တေဟ်

    ဂွံဗလးပတိုန်လဝ်ဝဴဂှ် ဂၠေံရ။

= ဇုက်တောဝ်ဝဴဂှ်

    ဂၠိင်လေဝ်ကဵုဒှ် , ဂၠေံလေဝ်ကဵုဒှ်

    တၞုင်ပယျဵုဒၞက်တောဝ်ဂှ် နွံဂှ် ဒးနွံဟေင်ရ။

= ဟိုတ်ဂှ်ရ

    ဝဴမတွံဂး မၞိဟ်ဗြဴတံ

    ပ္ဍဲပရေင်ကဝေင် , ပရေင်အိန်ထံင်တံဂှ်.....

    နကဵုဓရ်ကၠိုဟ်ခၠင်နွံနွံ

    ချပ်ဗ္စာစင်ခြင်ကဵုလေပ်အိုတ်ညိ.....

= ကာလပယျဵုဒၞက်တောဝ်ညးအိုတ်

    ညးကၠိုဟ်ကဵုစိုတ်ဇၞော်ဇၞော် , စွံကဵုစိုတ်ဂၠိင်ဂၠိင်တုဲ

    ကလေင်ပူပၠောပ်နင်မာန်ဒၟံင်မဏီတှ်ေ ခိုဟ်ကွေံရ.....

    ညးဇမၠိင်ကဵုစိုတ်ဟွံမာန်တုဲ

    ညးကုတ်ထပိုတ်ထောံတောဝ်ဂှ်တှ်ေ.....

    ဗီုညးကဵုညး , ဗီု ဝူ ကဵု ဝူ

    ဒးသီအာဇာတ်ပရေင်ဆာန်တံ မာန်ဏောင်ဂှ်

    သတိမွဲကဵုနွံညိ။

= သတိဟွံမွဲ

    ပရေင်ဍိုဟ်ကေက်ဟွံမွဲမ္ဂး

    ဗီုဣဒါ... ဒးဒုင်တေံဏာလ္ဒောဝ်ပေဲါဂှ် ရံင်လဝ်.....

    ဣဏံရ... ဟိုတ်နူမဝိုက်ဇကု.....

    ညေအ်ဟွံတီကဵုဒၞဲာ ,

    ညေအ်ဟွံတီဗၞတ်ဗ္ၜတ် , ညေအ်ၜက်ပယျဵုတုဲ

    ဒးဒုင်ဂွအာကဵုမၞိဟ်ဂမၠိုင် လ္ဒောဝ်ပေဲါရသေင်။

= ဟိုတ်ဂှ်ရ

    " မိက်ဂွံဒုင်သၠေံ ဒးတေံလ္ဒောဝ်ပေဲါ "

    အရေဝ်ညးဟီုစ နွံကၠုင်ရသေင်ဟာ။ ။

                    ဗွဲမအဲပရဲ = ပြေဂုဏ်မာန်

                         ( 11 , 9 , 2021 )